news image
Formësimi i së Ardhmes: Arsimi & Inovacioni në Shoqërinë Digjitale

Agjencia e Zbatimit të Gjuhës pjesë e Konferencës së 8 të Ndërkombëtare “Formësimi i së Ardhmes: Arsimi & Inovacioni në Shoqërinë Digjitale” Agjencia e Zbatimit të Gjuhës do të marrë pjesë si partner institucional në Konferencën e 8 të Ndërkombëtare “Formësimi i së Ardhmes: Arsimi & Inovacioni në Shoqërinë Digjitale”, e organizuar nga Fakulteti i Edukimit pranë Universitetit “Aleksandër Moisiu” Durrës, Shqipëri. Konferenca do të zhvillohet më 29–30 prill 2026, në format hibrid (me prezencë fizike dhe online). Në këtë aktivitet shkencor ndërkombëtar, Agjencia e Zbatimit të Gjuhës merr pjesë së bashku me universitete dhe qendra kërkimore nga Sllovakia, Italia, Spanja, Rumania, Polonia, Lituania, Maqedonia e Veriut dhe Kosova, duke ofruar një platformë shkencore për diskutimin e ndikimit të digjitalizimit, teknologjive të reja dhe zhvillimeve shoqërore në arsim dhe shkencat humane. Aplikimet tashmë janë të hapura për dorëzimin e abstrakteve në temat kryesore të konferencës, që përfshijnë inovacionin në arsim, shëndetin mendor të të rinjve, transformimin digjital, gjuhën shqipe, gjuhët e huaja, letërsinë dhe mësimin gjatë gjithë jetës. Për të parë temat dhe për të aplikuar, klikoni këtu: https://uamd.edu.al/.../uploads/2025/12/Call-for-paper.docx Afati për dorëzimin e abstrakteve është 1 shkurt 2026. Agjencia e Zbatimit të Gjuhës mirëpret bashkëpunimin shkencor dhe pjesëmarrjen e studiuesve në këtë aktivitet ndërkombëtar.

Dec 24, 2025
news image
TË PUNËSUARIT E AZGJ-SË NDOQËN NJË TRAJNIM PËR PËRSOSMËRI PROFESIONALE

 Gjatë javës së kaluar (10-12 dhjetor), të punësuarit e Agjencisë së Zbatimit të Gjuhës të RMV-së ndoqën një trajnim treditor për përsosmëri profesionale me temë “Zbatimi i zgjidhjeve të reja ligjore në menaxhimin e burimeve njerëzore”, si dhe me temën tjetër “Analiza funksionale, organizimi i brendshëm dhe sistematizimi i vendeve të punës”. Trajnimi në fjalë u mbajt në hapësirat e hotelit “Drin” në Strugë. Të punësuarit e AZGJ-së gjatë ndjekjes së këtij trajnimi u njohën hollësisht me risitë që përmban Ligji i Nëpunësve Administrativë, veçmas në aspektin e punësimit, të avancimit, të vlerësimit, të menaxhimit të performancës, të rrogës dhe të shtesave të tjera të saj etj. Po ashtu, ata u informuan edhe me risitë e Ligjit të të Punësuarve në Sektorin Publik, sidomos me pjesën që ka të bëjë me mobilitetin, me punën në distancë, me ndryshimet dhe detyrimet e reja që njëra pjesë do të hyjë në fuqi në vitin 2026 dhe pjesa tjetër do të hyjë në fuqi në fillim të vitit 2027. Edhe për sa i përket temës së dytë, të punësuarit u njohën me disa aspekte të funksionimit, siç është ajo që lidhet me përgatitjen e analizës funksionale duke filluar nga qëllimi i saj, metodologjia e përpilimit e deri te zbatimi konkret. Krahas kësaj ata u njohën edhe me mënyrën e përgatitjes së rregullores së sistematizimit, me përgatitjen e rregullores së organizimit të brendshëm, me katalogun e vendeve të punës, me procedurat për ndryshimin e rregulloreve, me harmonizimin me ndryshimet ligjore dhe me qëllimet strategjike etj. Në fund, të punësuarit e AZGJ-së morën nga një certifikatë për ndjekjen e këtij trajnimi për përsosmëri profesionale.

Dec 24, 2025
news image
UNT dhe Agjencia e Zbatimit të Gjuhës shënojnë Ditën e Alfabetit me Akademi Solemne në Shkup Universiteti “Nënë Tereza” (UNT) në Shkup

UNT dhe Agjencia e Zbatimit të Gjuhës shënojnë Ditën e Alfabetit me Akademi Solemne në Shkup Universiteti “Nënë Tereza” (UNT) në Shkup, në bashkëpunim me Agjencinë e Zbatimit të Gjuhës dhe Muzeun e Alfabetit në Manastir, organizuan akademi solemne kushtuar 22 Nëntorit – Ditës së Alfabetit të Gjuhës Shqipe, si ngjarje me rëndësi thelbësore për kulturën dhe identitetin kombëtar shqiptar. Në fjalimin e tij para të pranishmëve, rektori i UNT-së, Prof. Dr. Bekim Fetaji, theksoi se gjuha dhe alfabeti shqip përbëjnë shtyllën themelore të identitetit, kulturës dhe dijes kombëtare. “Me 22 Nëntorin kujtojmë jo vetëm themelimin e alfabetit, por edhe përkushtimin ndaj vazhdimësisë së gjuhës dhe arsimit shqip”, u shpreh ai. Ndërkaq, drejtori i Agjencisë së Zbatimit të Gjuhës, z. Granit Osmani, me këtë rast theksoi rëndësinë dhe punën e vazhdueshme institucionale të Agjencisë në mbrojtjen dhe standardizimin e gjuhës së shkruar: “Agjencia, me ekipin e vet profesional, mbetet e përkushtuar në forcimin e përdorimit korrekt dhe zyrtar të gjuhës shqipe.” Në Akademi gjithashtu morën pjesë personalitete të larta të arsimit, kulturës dhe diplomacisë, përfshirë: z. Lulzim Aliu, zëvendësministër i Arsimit dhe Shkencës, z. Aldo Kelmenti, diplomat në Ambasadën e Republikës së Shqipërisë në RMV. Zëvendësministri Aliu vlerësoi rolin historik të alfabetit shqip, duke e cilësuar atë si “mjet me të cilin ndërtohen brezat, shkruhet historia dhe zhvillohet kultura”. Fjalimi qendror i Akademisë u mbajt nga dekani i Fakultetit të Shkencave Humane, Prof. Dr. Mustafa Ibrahimi, i cili përkujtoi sfidat e intelektualëve shqiptarë për unifikimin e gjuhës së shkruar shqipe dhe rezistencën ndaj pengesave politike, kulturore dhe shoqërore të kohës. Në kuadër të aktiviteteve të ditës u nënshkrua edhe një Memorandum bashkëpunimi trepalësh ndërmjet Universitetit “Nënë Tereza”, Agjencisë së Zbatimit të Gjuhës dhe Muzeut të Alfabetit në Manastir, duke hapur rrugë për projekte të reja në fushën e gjuhës, kulturës dhe edukimit.

Nov 21, 2025
news image
Fjalimi i Drejtorit të Agjencisë së Zbatimit të Gjuhës në Akademinë Solemne kushtuar 22 Nëntorit – Ditës së Alfabetit të Gjuhës shqipe

 I nderuar Prof. Dr. Bekim Fetaji, rektor i Universitetit Nënë TerezaI nderuar z. Nuer Arsllani, drejtor i Muzeut të Alfabetit në ManastirI nderuar z. Aldo Kelmenti, përfaqësues i Ambasadës së Republikës së Shqipërisë në RMVTë nderuar të pranishëm,Disa data i përkasin jo vetëm historisë, por edhe ndërgjegjes së një kombi. Ka momente kur kombet nuk shkruajnë thjesht vendime, por fatin e tyre. Dhe 22 Nëntori është pikërisht një prej atyre kulmeve ku gjuha, identiteti dhe fati ynë kolektiv u takuan në të njëjtën tryezë, në Manastir, për t’i dhënë shqiptarëve një alfabet, pra një mënyrë të vetme për të shkruar veten.Sot, në këtë ditë të shenjtë të kulturës sonë, ne nderojmë Ditën e Alfabetit të Gjuhës Shqipe - një ndër gurët më të rëndë të themelit të shtetësisë, qytetarisë dhe ndërgjegjes kombëtare.Si Drejtor i Agjencisë së Zbatimit të Gjuhës Shqipe, ndihem i privilegjuar që flas në emër të një institucioni që ka për mision mbrojtjen, kultivimin dhe zbatimin e gjuhës sonë në të gjitha nivelet e jetës publike.Kongresi i Manastirit (14–22 nëntor 1908) ishte një dritare drejt së ardhmes që ne sot e quajmë të tashme. Ishte kuvendi më i rëndësishëm kombëtar i fillimshekullit XX, ku 50 delegatë nga të gjitha trevat shqiptare u mblodhën jo vetëm për të diskutuar rreth alfabetit, por për të përcaktuar drejtimin e vetë kombit.Në qendër të këtij procesi qëndroi komisioni prej 11 delegatësh, i kryesuar nga Gjergj Fishta, dhe i përbërë nga emra të mëdhenj si Ndre Mjeda, Gjergj Qiriazi, Mid’hat Frashëri, Luigj Gurakuqi e shume të tjerë. Pas debatit, punës dhe vizionit të tyre, u krijua alfabeti i ri, i mbështetur plotësisht në traditën e alfabetit latin alfabeti që brenda pak vitesh u bë i vetmi, i përbashkët dhe i pandashëm për të gjithë shqiptarët.Vendimet e Kongresit nuk ishin vetëm teknike, ato ishin akte themelimi. Ato ngritën arsimin, forcuan kulturën, bashkuan ndërgjegjen dhe krijuan premisat e emancipimit tonë kombëtar.Sot, kur gjuha shqipe sfidohet nga globalizimi, teknologjia dhe shpeshherë nga pakujdesia jonë, kujtesa e Kongresit të Manastirit na fton të kuptojmë se mbrojtja e gjuhës është vazhdim i asaj beteje të filluar në vitin 1908. Është betejë e dijes, e kulturës dhe e dinjitetit tonë.Në këtë ditë të shënuar, i bashkohem urimit të të gjithë shqiptarëve, kudo që jetojnë: Gëzuar Ditën e Alfabetit të Gjuhës Shqipe!Lavdi e përjetshme të gjithë 36 delegatëve të Kongresit të Manastirit, të cilët mbeten dritë udhërrëfyese në altarin e kombit.Detyra jonë sot është t’i qëndrojmë besnikë asaj trashëgimie, duke e mbrojtur gjuhën, duke e përdorur me dinjitet dhe duke e lartësuar si pasurinë më të çmuar të identitetit tonë.Granit Osmani, drejtor i Agjencisë së Zbatimit të Gjuhës

Nov 21, 2025
news image
Me rastin e Ditës Ndërkombëtare të Përkthimit, AZGJ-ja ua uron këtë ditë të gjithë përkthyesve

 Sot është Dita Ndërkombëtare e Përkthimit, që lidhet me Shën Jeronimin (347-420), përkthyesin e njohur të Biblës në latinisht (Vulgata), i cili njihet si shenjtori mbrojtës i përkthyesve. Më 24 maj të vitit 2017, Asambleja e Përgjithshme e Kombeve të Bashkuara miratoi Rezolutën 71/288, me të cilën 30 shtatorin e shpalli si Ditë Ndërkombëtare të Përkthimit në mbarë botën.Le të kujtojmë se në këtë ditë organizohen aktivitete të shumta anembanë botës nga organizata e institucione të ndryshme arsimore, shkencore, kulturore, artistike, duke e shënuar në forma e mënyra sensibilizuese, me qëllim të ngritjes së vetëdijes dhe vullnetit për respektim të ndërsjellë të të drejtave gjuhësore. Sigurisht, edhe Agjencia e Zbatimit ë Gjuhës e RMV-së e ka shënuar vazhdimisht këtë ditë të rëndësishme, duke e kujtuar rëndësinë e veçantë të saj për faktin se gjuhët janë mjet thelbësor i komunikimit ndërmjet njerëzve, aq më tepër në shtetet dhe shoqëritë shumetnike e shumëgjuhëshe ku përkthimi është domosdoshmëri për t’u kuptuar dhe për të qenë më afër njëri-tjetrit si kusht i respektimit të ndërsjellë etnik, gjuhësor, kulturor. Duke e pasur si veprimtari kryesore përkthimin, AZGJ-ja gjithmonë ka qenë dhe vazhdon të jetë bartëse e kësaj veprimtarie duke i ndihmuar institucionet shtetërore në Republikën e Maqedonisë së Veriut për ta zbatuar dygjuhësinë në pajtim me Ligjin e Përdorimit të Gjuhëve, thjesht duke përkthyer të gjitha aktet, dokumentet, shkresat, procesverbalet, formularët, udhëzuesit, doracakët etj., që janë në interes të qytetarëve. Puna e saj sistematike e ka ngritur në shkallën e institucioneve më aktive brenda vendit, për arsye se ka arritur të krijojë një bashkëveprim më konkret në aspektin e komunikimit qytetar, duke mënjanuar shumë paragjykime e pengesa ndërgjuhësore, si dhe duke krijuar një ndjeshmëri dhe normalitet për funksionimin gjuhësor në RMV. Kjo nënkupton faktin se AZGJ-ja vazhdon të japë kontributin e saj në zbatimin zyrtar të gjuhëve në Republikën e Maqedonisë së Veriut, duke ruajtur e kultivuar frymën e barazisë dhe të drejtave qytetare si detyrim ligjor, por edhe si një vlerë qytetëruese e demokratike.Me këtë rast AZGJ-ja ua uron këtë ditë të gjithë përkthyesve të cilët kontribuojnë në këtë drejtim, duke u dëshiruar mbarësi e suksese në të gjitha proceset dhe sfidat e përkthimit të mëtejmë.

Sep 30, 2025
Informacion kontakti
  • St., "Philip the Second of Macedonia" no. 11,
    3rd floor Skopje, Republic of North Macedonia

  • Phone number
    02 312 1731
  • Email
    info@apj.gov.mk