Post image
Drejtori Sela në takim pune në Gjykatën Administrative

Dec 19, 2019

Drejtori i AZGj-së, Ylber Sela, sot realizoi takim pune në Gjykatën Administrative të Republikës së Maqedonisë së Veriut, me ç’rast u takua me Burim Sejdinin, kryetarin e kësaj gjykate. Drejtori Sela e njoftoi B. Sejdinin për vështrimet dhe analizat rreth zbatimit të deritashëm të Ligjit për Përdorimin e Gjuhëve dhe për nevojën e zbatimit konsekuent të ligjit nga të gjithë faktorët, duke shprehur gatishmërinë për bashkëpunim në nivel ndërinstitucional. Kryetari Sejdini shprehu kënaqësinë e tij nga takimi me drejtorin Sela duke falenderuar për mbështetjen dhe bashkëpunimin që ofron AZGj-ja për Institucionet për sa i përket përkthimeve dhe lekturimeve profesionale në çështje komplekse. Njëkohësisht, ai e informoi Selën rreth aktiviteteve të Gjykatës Administrative dhe theksoi nevojën e plotësimit të ekipit profesional, si dhe përforcimin e kapaciteteve profesionale të gjykatës me angazhimin e përkthyesve dhe lektorëve. Gjatë takimit, të dyja palët e riafirmuan nevojën për përforcimin e bashkëpunimit, duke pranuar rëndësinë që ka stimulimi i një ambienti social në respektimin e të drejtave kushtetuese dhe ligjore të çdo qytetari, si dhe në promovimin, ruajtjen dhe përforcimin e të drejtës së qytetarëve për të përdorur gjuhët zyrtare në Republikën e Maqedonisë së Veriut. [gallery size="publisher-lg" bgs_gallery_type="slider" bgs_gallery_image_size="full" ids="2999,3002,3005,3008,3011"]

Post image
Drejtori Sela në vizitë të Qendrës Hulumtuese EURAC në Itali

Dec 12, 2019

Pas vizitës së punës në Austri, delegacioni i udhëhequr nga Ylber Sela, drejtori i Agjencisë për Zbatimin e Gjuhës, i shoqëruar nga Tahir Hani, zëvendëssekretari i përgjithshëm i Qeverisë së Maqedonisë së Veriut, e vizitoi Qendrën Hulumtuese EURAC në Bolzano, që është pjesë e provincës autonome të Tirolit Jugor, e cila paraqet një nga qendrat hulumtuese më eminente në Evropë. Në kuadër të vizitës së EURAC-ut, drejtori Sela realizoi takim pune me Andrea Abel – drejtoreshë e Institutit të Gjuhësisë së Zbatueshme, Klara Kranebiter – hulumtuese në Institutin e Gjuhësisë së Zbatueshme, Karolin Zviling – hulumtuese e lartë dhe koordinatore në Institutin e Federalizmit Krahasues, Mark Rogla – hulumtues në Institutin për të Drejtat e Pakicave, dhe Sabrina Kolombo – hulumtuese në Institutin e Gjuhësisë së Zbatueshme. Takimi i punës ishte një mundësi e shkëlqyeshme për prezentimin e punës së AZGJ-së në kontekst të zbatimit të kompetencave që burojnë nga Ligji i Përdorimit të Gjuhëve dhe projekteve në drejtim të promovimit, mbrojtjes dhe avancimit të gjuhës shqipe si gjuhë zyrtare në Republikën e Maqedonisë së Veriut, ashtu si edhe prezentim të aktiviteteve të projekteve të EURAC-ut në lidhje me projektet aktuale në Evropën Juglindore. Të dyja palët shprehën interes për intensifikimin e dialogut reciprok dhe konkretizimin e bashkëpunimit përmes modalitetesh të ndryshme që përfshijnë shkëmbim të përvojave të ekspertëve në fushën e zbatimit të projekteve gjuhësore, përpilim të fjalorëve digjitalë terminologjikë, vizita studimore në nivel institucional dhe bashkëpunim të mundshëm për projekte shkencoro-hulumtuese. [gallery size="publisher-lg" bgs_gallery_type="slider" bgs_gallery_image_size="full" ids="2910,2907,2904,2901,2898,2895"]

Post image
Drejtori Sela në vizitë pune në Austri

Dec 11, 2019

Në kuadër të vizitës zyrtare të delegacionit të udhëhequr nga drejtori i Agjencisë për Zbatimin e Gjuhës, Ylber Sela, në Austri, i shoqëruar edhe nga Tahir Hani – zëvendëssekretari i përgjithshëm i Qeverisë së Republikës së Maqedonisë së Veriut, u realizua takim në selinë e EURAC – qendra hulumtuese në Vjenë, e ndodhur në kompleksin Vienna International Centre. Takimi i punës ishte me Eleonora Musko nga selia e EURAC-ut në Vjenë, Sonja Gebert dhe Iskra Stojanova nga United Nations Environment Programme (UNEP), të cilat bashkëpunojnë me EURAC-un në projekte të përbashkëta. Takimi ishte një mundësi e shkëlqyeshme për punën e deritanishme dhe aktivitetet për projekte të AZGJ-së dhe EURAC-ut, e gjithashtu u diskutuan mundësitë dhe fushat për bashkëpunim të mundshëm ndërinstitucional. Gjatë vizitës në Vjenë, drejtori Sela realizoi takime edhe me përfaqësues të OSBE-së në zyrat e Hofburg Conference Centre, ku u takua me Mariana Roibu – oficere për përkrahje të politikave nga Reparti i Evropës Juglindore, si dhe me Peter Mossop – këshilltar i veçantë, me të cilët u bisedua për bashkëpunimin e shkëlqyeshëm të deritanishëm ndërmjet AZGJ-së dhe Misionit të OSBE-së në Shkup, e njëkohësisht u theksuan edhe përpjekjet për vazhdimin e intensifikimit të dialogut reciprok. [gallery size="publisher-lg" bgs_gallery_type="slider" bgs_gallery_image_size="full" ids="2874,2877,2880,2883,2886"]

Post image
Drejtori Sela takohet me zëvendësambasadorin gjerman Graf

Dec 3, 2019

Drejtori i Agjencisë për Zbatimin e Gjuhës (AZGJ), Ylber Sela, realizoi takim pune me Oto Graf, zëvendësambasador i Republikës Federale të Gjermanisë në Republikën e Maqedonisë së Veriut. Në takim, drejtori Sela shprehu kënaqësi për vizitën dhe interesin e ambasadës gjermane për punën e AZGJ-së dhe falënderoi për ndihmën e deritanishme të Republikës Federale të Gjermanisë që po i jep Republikës së Maqedonisë së Veriut në më shumë segmente sociale. Ai gjithashtu informoi bashkëbiseduesin e tij për rëndësinë e funksionimit të AZGJ-së për krijimin e një shoqërie kohezive multietnike që na shpie drejt integrimit dhe jo ndarjes së qytetarëve, gjegjësisht shoqëri që garanton, promovon dhe avancon të drejtat e qytetarëve të saj, duke përfshirë edhe të drejtën për t’u shprehur dhe përdorur gjuhën e tyre amtare. Zëvendësambasadori Graf shkëmbeu mendime me drejtorin Sela për përvojat dhe sfidat për njohjen dhe vendosjen e gjuhës gjermane në suaza evropiane dhe shprehu gatishmëri për bashkëpunim me drejtorin Sela për të ngritur në një nivel tjetër dialogun dhe përkrahjen e ndërsjellë për punën e AZGJ-së drejt realizimit të përcaktimeve programore. Të dyja palët u dakorduan që arsimi është një nga segmentet kryesore ku duhet të bëhen përpjekje më të mëdha për të thyer stereotipet e paragjykimet nacionaliste dhe se përmes politikave cilësore dhe të konceptuara mirë të arsimit mund të ndikohet pozitivisht në ndërgjegjësimin dhe rëndësinë e pranimit dhe mësimit të gjuhës së bashkëqytetarit të një etnie tjetër si pasuri dhe mjet për komunikim dhe mirëkuptim të ndërsjellë. [gallery size="publisher-lg" bgs_gallery_type="slider" bgs_gallery_image_size="full" ids="2849,2852"]  

Post image
Vizitë e drejtorit Ylber Sela në Galerinë Nacionale

Dec 2, 2019

Drejtori i Agjencisë për Zbatimin e Gjuhës, Ylber Sela, me bashkëpunëtorët e tij sot e vizitoi Galerinë Nacionale “Stacioni i Vogël” në Shkup, ku u prit nga drejtoresha e këtij institucioni, Dita Starova-Qerimi. Në këtë takim u fol për procesin e zbatimit të dygjuhësisë. Meqë tanimë në tërësi ka përfunduar faza e parë e zbatimit të dygjuhësisë në këtë galeri, dy homologët në fjalë biseduan kryesisht për fazën e dytë, e cila do të fillojë të zbatohet prej muajit janar të vitit të ardhshëm. Me këtë rast drejtoresha Dita Starova-Qerimi foli konkretisht për përgatitjet që po bën lidhur me jetësimin e fazës së dytë në praktikë, për angazhimin e kuadrit të përkthyesve dhe lektorëve, për mjetet e nevojshme që duhet të ndahen lidhur me përkthimin e katalogëve dhe botimeve të tjera në gjuhën shqipe etj. Po ashtu, nga ana tjetër edhe drejtori Ylber Sela i dha mbështetje të plotë për sa i përket punës që po bën ajo në këtë institucion, konkretisht në fushën e përkthimit dhe korrigjimit të teksteve për nevojat e Galerisë Nacionale. Në fund, drejtori Ylber Sela e përgëzoi homologen e tij për punën e suksesshme që po bën në Galerinë Nacionale gjë që u vërejt edhe sot në zbatimin e dygjuhësisë së plotë në këtë institucion, që nga tabelat në hyrje, logoja, vulat e deri te aktet, shkresat e udhëzimet e ndryshme brenda galerisë. [gallery size="publisher-lg" bgs_gallery_type="slider" bgs_gallery_image_size="full" ids="2840,2837,2834,2831,2828"]

Post image
Ambasadori i BE-së Zhbogar viziton AZGJ-në

Nov 28, 2019

Drejtori i Agjencisë për Zbatimin e Gjuhës, Ylber Sela, priti një delegacion të udhëhequr nga Shefi i Delegacionit të Bashkimit Evropian në Republikën e Maqedonisë së Veriut, Ambasadorin Samuel Zhbogar i shoqëruar nga Virve Vimpari këshilltare dhe udhëheqëse e njësisië për projekte. Në takim, Drejtori Sela shprehu kënaqësi për vizitën e përfaqësuesit të lartë të BE-së dhe shprehu mirënjohjen e tij për këtë takim të drejtpërdrejtë dhe mundësinë për të shkëmbyer mendime, me çka ai e informoi Ambasadorin Zhbogar për rolin jashtëzakonisht të rëndësishëm dhe institucionalizimin e AZGJ-së e cila është e gatshme të mbështesë Qeverinë për krijimin e një shoqërie demokratike e moderne, që garanton, respekton dhe promovon të drejtat gjuhësore të qytetarëve të saj, në përputhje me standardet evropiane. Drejtori Sela, gjithashtu, informoi bashkëbiseduesin e tij për nevojën e përforcimit të kohezionit dhe të bashkëpunimit ndëretnik shoqëror, si dhe përpjekjet për të krijuar mundësi për funksionimin e plotë teknik dhe operacional të AZGJ-së dhe, në këtë kontekst, shprehu gatishmëri për bashkëpunim me Delegacionin e BE-së për të mbështetur qëllimet dhe planet nga programi i AZGJ-së. Ambasadori Zhbogar falënderoi drejtorin Sela për ftesën e tij, për të vizituar Agjenicinë për Zbatimin e Gjuhës dhe shprehu kënaqësi për entuziazmin dhe motivimin me të cilin drejtori Sela po përmbush misionin dhe qëllimin për të cilin u themelua AZGJ-ja. Ambasadori Zhbogar shprehu interes për punën dhe projektet e planifikuara të AZGJ-së dhe shkëmbyen mendime me drejtorin Sela për sfidat e zbatimit të Ligjit për Përdorimin e Gjuhës, veçanërisht në gjyqësor. Gjatë vizitës, Ambasadori Zhbogar dhe bashkëpunëtorja e tij shfaqën interesim edhe për kushtet në të cilat funksionon AZGJ-ja ku planifikohet edhe krijimi i një qendre trajnimi për përkthyes dhe korrektorë të kombinimeve gjuhësore maqedonisht-shqip dhe shqip-maqedonisht për nevojat e institucioneve publike. Të dyja palët theksuan angazhimin e tyre për të vazhduar dialogun e përbashkët, si dhe komunikimin e rregullt dhe analizën e mundësive për të mbështetur AZGJ-në për të zbatuar projektet e planifikuara. [gallery size="publisher-lg" bgs_gallery_type="slider" bgs_gallery_image_size="full" ids="2817,2814,2811"]

Informacion kontakti
  • St., "Philip the Second of Macedonia" no. 11,
    3rd floor Skopje, Republic of North Macedonia

  • Phone number
    02 312 1731
  • Email
    info@apj.gov.mk